إعترافات

خلاص هاعترف مفيش داعي إني أضحك على نفسي

هعترف إني بكره الماسنجر و الفيس بوك و الموبايل و تليفون البيت بالذات الموبايل ده هو و تليفون البيت

بس مش بكره البلوج رغم إني بتجيلي حاله كدة كل شهرين بافتحه و أغير شكله و أكتب كام بوست بعد كدة باسيبه مش بفتحه تاني

و هاعترف إني أوقات كتيرة جداً بابئي عايزة أهرب من كل الناس و مش عايزة حد يوصللي حتى الموبايل بتاعي فضل أسبوع فاصل شحن و مكنتش عارفه هو فين و مدورتش عليه بضمير و لما لقيته بصتله و أنا متدايقة و سبته شويه بعدين إضطريت إني أشحنه

و هعترف إني كسلانة جداً جداً و متوسط عدد ساعات نومي 12 ساعة في الأيام العادية و في الويك إند 18 و في الأجازات الطويلة ممكن أنام يومين ورا بعض

و هعترف إني خايفة من الثانوية العامة اللي هدخل السجن بتاعها كمان ساعات قليلة جداً رغم إني أنا اللي قررت إني أدخل ثانوية عامة مصرية مع إني عايشة في جدة و كان ممكن أكمل في النظام السعودي الفاشل و رغم إني كنت شاطرة طول السنين اللي كنت بدرس فيها في مصر و رغم إني طلعت السنة دي الأولى على الفصل و جبت 99.57 % مع ذلك خايفة جداً و بقالي أسبوع باحلم بكوابيس الرابط المشترك ما بينها كلها إنها في لجنة الإمتحان

و هعترف إني عيطت لما جهازي حبيبي إتفيرس و الهارد بئي أبيض مفيهوش أي حاجة و كل تصميماتي و كتاباتي إتمسحت للأبد و كل محاولتي إنها ترجع بائت بالفشل

هعترف إن الخمسة و أربعين يوم أجازة اللي قضيتهم في إسكندرية مش كفاية أبداً و إسكندرية و حشتني من أول ما ركبت الطيارة و أنا راجعة جدة و في نفس الوقت أنا بحب بابا و مقدرش أقضي الفترة دي من حياتي من غيرة

و أخيراً أنا شاكة إني عندي المرض اللي عند مصطفى بطل رواية تغريدة البجعة

يا رب السنتين اللي جايين دول يعدو علي خير

كل سنة و الناس كلهم طيبين