بعد ما إتعلمت الفوتوشوب لسة بفتح الرسام
و أرسم الرسومات اللى كنت برسمها أول ما تعلمت أفتح الكمبيوتر
3 أهرامات
أو بيت له شباكين و باب
و سقف مثلث و مدخنة
لسة
بخاف لما أوصل للمستوى اللى هحارب فيه الوحش
و بخبط إيدي في المكتب و أتضايق لما الأكل "البونس" يضيع مني
لسة
مش بحب الجيرسي بس بحب الماندولين
عشان إعلان الجيرسي بيخوفني
بخاف من شكل طلعت زين و هو لابس البدلة الغريبة دي بحس إنه كائن فضائي
لسة
لما أسمع نيللي بتغني لبنتها
يا عصفورة العصافير
أو عفاف راضي بتغني أصحي يا دنيا
بتخيل نفسي بطلة الأغنية
و لسة برسم عالم جميل في خيالي و بشوف بعيني كل الأحداث اللي بسمعها
كأني جوه الأغنية
لما أسمع
الكلب لولو
يا ما قالولو
بلاش تعض قط الجيران
دا قط شااطر
نبيه وماهر
دايما بيصطاااااد الفيران
لسة
عايزة أنزل ألعب في الجنينة
مع جيراني و أصحابي و أخواتي
نلعب بوليس و حرامية و أب و أم و عجل و حبة ملح و سيجا و سباق
كلنا نقف على الخط
و نقول
ردي ستيدي جو
و نطلع نجري بعدها
و نلعب إستغماية
خلااااااااويييييييص ... لـــــــــــــــــــسة
طب خلاويص ........ لــــــــــــــسة
أنا هفتح ...........خلاص فتح
و نخترع ألعاب جامدة جداً جداً
لسة عايزة أنط من شباك الدور الأول
و أتسلق الماسورة من شباك الدور التالت
لسة
بعد ما أخلص فرجة على برامج النكد و الأخبار
بقلب خلسة على سبيس تون
يمكن يكون ريمي شغال أو عهد الأصدقاء
أو سابق و لاحق أو كونان
لسة
جسمي بيقشعر
لما نبيل الحلفاوي يعرف يصلح التلات حاجات اللى مش فاهمة هما إيه
في فيلم الطريق إلي إيلات
و لسة بعيط لما مرسي بيموت
لسة
عايزة بابا يجيبلي فانوس رمضان
ليه السنا دي لما قلت لهم أنا عايزة فانوس ضحكوا و قالو لي جيبي من مصروفك
إزاي أجيب الفانوس من مصروفي يعني
إشمعنى لما كان عندي 7 سنين كان بيجبهولي كأنه حاجه أساسية مفيهاش نقاش
و كنت بنزل الشارع مع صحابي
نصلى التراويح و بعديه الصبيان يفرقعوا الصواريخ و نلعبوا كلنا بالفوانيس مع بعض في مدخل العمارة
لسة
لما بروح عند أي بتاع جرايد
بفضل أبص يمكن ألاقي مجلة ماجد أو العربي الصغير
أو قطر الندى
لسة
لما بسمع أغنية زمان و أنا صغير كنت بحلم أبئي كبير
بفتكر و أنا صغيرة
لما كنت بقول لنفسي
إيه العبيط ده حد بعد ما يكبر يقول يا رتني ما كنت كبرت
أنا لما هكبر مش هقول كدة
بس اللى بيحصل إني بقول كدة النهاردة
صعب جداً السن اللي أنا فيه ده
توهان ما بين الكبار و الصغيرين
سن مرهق و متعب
عايزة أبئى كبيره و مستقلة و صاحبة رأي و في نفس الوقت مش قادرة أنخلص من الحنين للطفولة
و خايفة من المسؤلية
أكيد سموه سن المراهقة عشان هو فعلاً سن مرهق
7 comments:
راااااااااااااائعة
احساسك حلو
عرفتي توصفي حالة صعبة الوصف
بس خلي فيه طفلة عايشة جواكي ساعة ما تحتاجيها طلعيها
وخليكي كبيرة قدام الناس
اوعي الطفل اللي جواكي يتوه
واوعي الكبيرة ده تبقي كئيبة
احمد ابو ادم
واحنا صغيرين بنحلم اننا نكبر عشان نكتشف الحياة
لما نكبر بنحلم اننا نضغر .. هرب من الي احنا اكتشفناه
أحمد
كلامك حلو جداً نصيحة غالية هحاول أفضل محافظه عليها
-----
أنس
فعلاً بالظبط هو الموضوع هرب
أحياناً قلة المعرفة بتكون نعمة كبيرة
مش بنحس بيها فعلاً إلا لما نعرف
لــســه
قاريها حالا :D
اكتشفت حاجة .. انك اما بتكتبي عن نفسك بتفتري .. ولازم التدوينة تعلم مع الواحد
منتهى التلقائية والحميمية
رائعة يا شروق
يعنى مفيش كلمة أخف من بتفتري دي حتى مش لايقة خالص
:))
ماهو انا اما شوفتها دلوقت عرفت انها مش لايقة .. بس انا كان قصدي بتفتري في المشاعر والحميمية يعني :D:D
لو كدة أوك
أنا مفترية
:))
Post a Comment